အချစ်နှင့်အတူ (၉)

(၉)

ကိုမိုးမြင့်ယံ၏ ဘန်ဂလိုသို့ မေ ရောက်ချိန်တွင် သူက မေ့အား ဘန်ဂလိုရှေ့ မှ ကြိုစောင့်နှင့်နေသည်။

“စောင့်နေတာ ကြာပြီလား ကိုမိုးမြင့်ယံ”
မေ မိုးမြင့်ယံအား ပြုံးပြရင်း မေးလိုက်မိ၏။

“မကြာသေးပါဘူး မမေမြတ်နိုး”

“ဟုတ်ကဲ့ ကိုမိုးမြင့်ယံ၊ မေ အလုပ်ပြီးမှလာရတာဆိုတော့ နည်းနည်းနောက်ကျသွားသလားလို့ပါ”
မေ အားနာစွာဖြင့် ထပ်ပြောလိုက်မိသည်။

“ရပါတယ် မမေမြတ်နိုး”

“ဟုတ်ကဲ့”

“ကျွန်တော်တို့ ကမ်းခြေမှာ လမ်းလျှောက်ရင်း စကားပြောကြမလား မမေမြတ်နိုး”
မိုးမြင့်ယံက မေမြတ်နိုးအား ခွင့်တောင်းဟန်ဖြင့် မေးလိုက်၏။

“ဟုတ် ရပါတယ် ကိုမိုးမြင့်ယံ”
ထို့နောက်တွင်တော့ မေတို့ နှစ်ယောက် ကမ်းခြေဘက်သို့ ထွက်လာခဲ့ကြတော့သည်။

ညနေခင်းအချိန်မို့ ကမ်းခြေတွင် လမ်းလျှောက်သူများ ဟိုတစ်စ ဒီတစ်စဖြင့် တွေ့နေရလေသည်။ မိုးတွင်း ကာလဖြစ်သော်လည်း ဧည့်သည်က လုံးဝမရှိခြင်းတော့မဟုတ်ပေ။ သူ့ဟိုတယ်နှင့်သူ အနည်းငယ်တော့ ရှိကြသည်။ အေးအေးဆေးဆေး အနားယူအပန်းဖြေသူများက ယခုလိုအချိန်မျိုးတွင် အများဆုံးလာတတ်ကြ သည်။ ထို့ကြောင့်လည်း ကမ်းခြေတွင် လူပြတ်သောအချိန်ဟူ၍ သိပ်မရှိချေ။

“မမေမြတ်နိုးက ဒီမှာ အလုပ်လုပ်တာကြာပြီလား”
မိုးမြင့်ယံက မေတို့ကြားက တိတ်ဆိတ်နေမှုအား အမေးစကားဖြင့် ဖြိုခွဲလိုက်၏။

“သိပ်မကြာသေးပါဘူး ကိုမိုးမြင့်ယံ”

“ကျွန်တော်က မမေမြတ်နိုးကို ဒီဟိုတယ်မှာ ကျွန်တော့်လို လာတည်းတယ်လို့ပဲ ထင်နေတာ၊ နောက်တော့မှ လာတည်းတာ မဟုတ်မှန်း၊ ဒီမှာ အလုပ်လုပ်နေမှန်း သိရတာလေ”

“ဟုတ်ကဲ့ ကိုမိုးမြင့်ယံ”

“မမေမြတ်နိုးကို ကျွန်တော် “မေ” လို့ပဲ ခေါ်လို့ရမလား”

“ရပါတယ် ကိုမိုးမြင့်ယံ”
မေမြတ်နိုးက မိမိအား ခွင့်တောင်းသလိုပြောလာသော မိုးမြင့်ယံအား လှည့်ကြည့်လိုက်ပြီး ပြောလည်းပြော ခေါင်းလည်းငြိမ့်ပြလိုက်၏။

“ကိုမိုးမြင့်ယံက မေ့ကို ဒီဟိုတယ်မှာ တည်းနေတယ်လို့ ဘာလို့ထင်သွားတာလဲ”
မေ မိုးမြင့်ယံအား ဆက်၍မေးလိုက်မိသည်။

“ကျွန်တော် မေ့ကို စတွေ့တဲ့အချိန်က မေ ဒန်းစီးနေတာလေ၊ နောက်ပြီး မေက အဲဒီနောက်က ဘန်ဂလို အပြာလေးမှာ နေတယ်မဟုတ်လား၊ ဒါကြောင့် ကျွန်တော့်လိုပဲ လာတည်းတဲ့သူလို့ ထင်သွားတာ၊ ဒါနဲ့ မေက ဘာလို့ အဲဒီဘန်ဂလိုမှာ နေတာလဲ၊ အဲဒါက ဧည့်သည်တွေအတွက် မဟုတ်ဘူးလား”

“ဟုတ်တယ် ကိုမိုးမြင့်ယံ၊ ဧည့်သည်တွေအတွက် ဘန်ဂလိုပါ”

“ဒါဖြင့် မေက …”
မိုးမြင့်ယံက အံ့သြဟန်ဖြင့် မေမြတ်နိုးအား မေးလိုက်သည်။

“မေ့ ဖေဖေနဲ့ မေမေက မေ နေဖို့အတွက် နှစ်ချုပ်နဲ့ ငှားပေးထားတာပါ”
မေ လေသံတိုးတိုးကလေးဖြင့် မိုးမြင့်ယံအား ဖြေလိုက်၏။

“ဟုတ်လား၊ သူတို့က မေ့ကို တော်တော်ချစ်ကြတာပဲနော်”

“ဟုတ်တယ် ကိုမိုးမြင့်ယံ၊ တကယ်တမ်းပြောရရင်တော့ မေ ဒီကိုလာတာကို မေ့မိဘတွေက ခွင့်မပြုချင်ကြဘူးလေ၊ ဒါပေမယ့် မေက မေ ၀ါသနာပါရာအလုပ်ဖြစ်လို့ အတင်းသွားမယ်ပြောတော့ သွားချင်သွား ဒါပေမယ့် အဆောင်မှာတော့ မနေရဘူးဆိုပြီး မေ့အတွက် ဘန်ဂလိုတစ်ခု အတင်းငှားပေးထား တာလေ၊ ဒါနဲ့ မေလည်း ဒီဘန်ဂလိုလေးကို ရွေးလိုက်တာ”
မိုးမြင့်ယံအား မေ သေချာစွာရှင်းပြလိုက်တော့သည်။

“အင်း ကောင်းပါတယ် မေ၊ တစ်ယောက်ထဲဆိုတော့လည်း အေးအေးဆေးဆေးရှိတာပေါ့”

“ဟုတ်တယ် ကိုမိုးမြင့်ယံ”

“မေ ရန်ကုန်ကိုကော မပြန်ဘူးလား”

“မေ ရောက်တာမကြာသေးတော့ ဒီကြားထဲတော့ မပြန်ဖြစ်ဘူး ကိုမိုးမြင့်ယံ၊ နောက်လလောက်ဆိုရင်တော့ မေ ခဏပြန်ဖြစ်မယ် ထင်တယ်”

“ဟုတ်လား၊ ဒါဆို မေ ရန်ကုန်ကိုပြန်လာရင် ကျွန်တော့်ကို ပြောလေ၊ ကျွန်တော် လာတွေ့မယ်လေ၊ လာတွေ့လို့ရတယ် မဟုတ်လား မေ”
မိုးမြင့်ယံစကားကြောင့် မေက မိုးမြင့်ယံအား သေချာစွာ ကြည့်လိုက်သည်။

မေ့အကြည့်ကြောင့် မိုးမြင့်ယံက

“ဘာဖြစ်လို့လဲ မေ၊ ခုမှတွေ့ပြီး နောက်လည်း လာတွေ့မယ်ပြောလို့လား”
မေ့အား အားနာစွာဖြင့် မေးလိုက်သည်။

“ဟုတ်တယ် ကိုမိုးမြင့်ယံ၊ ကိုမိုးမြင့်ယံနဲ့ မေက ခုမှသိကြတာလေ၊ မေ့ကို ဒီလိုမျိုး ကိုယ်ရေးကိုယ်တာတွေ မေးပြီး မေ ရန်ကုန်လာတဲ့အခါ လာတွေ့မယ်လို့ ပြောနေတော့ တဆိတ် မေ့ ကို အထင်သေးလို့လား၊ ကိုမိုးမြင့်ယံက မေ့ကို မေလို့ ခေါ်တာကို ချက်ချင်းခွင့်ပြုလိုက်လို့၊ နောက်ပြီး ကိုမိုးမြင့်ယံက မေ့ကို ညနေ တွေ့ချင်တယ်ပြောတာကို မေက လက်ခံပြီး ဒီလိုလာတွေ့လို့ မေ့ကို ပေါ့ပျက်ပျက် သဘောထားနေတာ လား”
မေ မကျေနပ်စွာဖြင့် တရစပ် မိုးမြင့်ယံကို ပြောလိုက်တော့သည်။

“ဟာ … မေ၊ အဲလိုမဟုတ်ပါဘူး၊ မေနဲ့ ကျွန်တော်နဲ့က ခုမှ သေချာစကားပြောဖြစ်ပြီး ခင်ကြပေမယ့်လည်း သိနေတာတော့ ကြာပြီလေ၊ နောက်ပြီး ကျွန်တော့် စိတ်ထဲမှာ မေက ကျွန်တော် ရင်းနှီးပြီးသား သူတစ်ယောက်ပါ၊ ဒါကြောင့် ခုလိုပြောဖြစ်တာပါ မေ၊ မေ့ကို အထင်သေးလို့၊ စော်ကားလို့ ပြောတဲ့စကား မဟုတ်ပါဘူး”
မျက်နှာပျက်စွာဖြင့် မိုးမြင့်ယံက မေ့အား သေချာရှင်းပြလိုက်သည်။

“ဒါဆိုလည်း ပြီးတာ ပါပဲ ကိုမိုးမြင့်ယံ”

“ကျေးဇူးပါပဲ မေ၊ ဒါက ကျွန်တော့် visiting card ပါ၊ ယူထားလိုက်နော် မေ”

“ကောင်းပါပြီ ကိုမိုးမြင့်ယံ”
မိုးမြင့်ယံ ကမ်းပေးသော visiting card လေးအား မေ လှမ်းယူလိုက်သည်။ card လေးအား မေ ပိုက်ဆံအိတ်ထဲသို့ ထည့်သိမ်းနေခိုက် မိုးမြင့်ယံက မေ့အား မေးလိုက်သည်။

“ကျွန်တော့်ကိုကော ပြန်မပေးဘူးလား မေ”

“မေ့မှာတော့ visiting card မရှိဘူး ကိုမိုးမြင့်ယံ၊ မေ မလုပ်ထားဘူး”
မေ မိုးမြင့်ယံအား တစ်ချက်ကြည့်လိုက်ရင်း ပြောလိုက်တော့သည်။

“ဟုတ်လား”

“ဟုတ်တယ် ကိုမိုးမြင့်ယံ”

“ဒါဆိုလည်း မေ့ ဖုန်းနံပါတ်လေးပဲ ဖြစ်ဖြစ်ရေးပေးလိုက်လေ၊ ရော့ မေ အဲဒီ visiting card လေး နောက်မှာ ရေးပေးလိုက်နော်”
မေက ဘာမှမပြောတော့ဘဲ အိတ်ထဲမှ ဘောပန်ကိုသာထုတ်၍ ဖုန်းနံပါတ်အား ရေးပေးလိုက်တော့သည်။ ထို့နောက် card လေး အား မိုးမြင့်ယံထံသို့ ပြန်ပေးလိုက်၏။

“မေက ကျွန်တော့်ကို ဖုန်းနံပါတ်ပဲ ရေးပေးတယ်၊ အိမ်လာလည်မှာစိုးလို့ အိမ်လိပ်စာ မရေးပေးတာလား”
မိုးမြင့်ယံက မေမြတ်နိုး ပေးလိုက်သော card လေးအား ကြည့်လိုက်ပြီးနောက် မေ့အား ပြုံးပြရင်း လှမ်းနောက်လိုက်လေသည်။

“မဟုတ်ပါဘူး ကိုမိုးမြင့်ယံ၊ မေက ခုဒီမှာရောက်နေတာမို့ အိမ်လိပ်စာမရေးပေးတော့တာပါ”

ထို့နောက်တွင်တော့ မေတို့ ဘာမှ မပြောဖြစ်တော့ဘဲ အတွေးကိုယ်စီဖြင့် လျှောက်နေခဲ့ကြသည်။ မကြာမီ မေတို့နှစ်ယောက် ကမ်းခြေရှိ စေတီတော်လေးနားသို့ ရောက်လာခဲ့ကြ၏။ ထိုစေတီလေးက ကမ်းခြေ၏ အလယ်တွင် တည်ရှိလေသည်။ ဧည့်သည်များက မနက်အာရုံတက်ချိန်နှင့် ညနေခင်းနေ၀င်ချိန်လောက်တွင် ထိုစေတီတော်လေးအား လာရောက်ဖူးမျှော်ကြ၏။ “မောင်နှံစေတီတော်” ကဲ့သို့ ဆုတောင်းပြည့်စေတီတော် တစ်ဆူဖြစ်သည်။ စေတီလေးက အလွန်လည်း သပ္ပါယ်လှလေသည်။

“ကိုမိုးမြင့်ယံ စေတီဝင်ဖူးအုံးမလား”

“ကောင်းသားပဲ မေ၊ အတူတူဝင်ဖူးကြတာပေါ့”
မိုးမြင့်ယံက မေ့အား ဖြေပြီးနောက် စေတီတော်လေးထဲသို့ ၀င်သွားလိုက်သည်။ ထို့နောက် ဘုရားရှိခိုး ဆီမီး ပူဇော်ပြီး မေတို့လမ်းဆက်လျှောက်ဖြစ်ခဲ့ကြသည်။ အတော်ကြာ လျှောက်ပြီးနောက် မေမြတ်နိုးက

“ကိုမိုးမြင့်ယံ … နည်းနည်းမှောင်လာပြီဆိုတော့ ဟိုတယ်ကို ပြန်ကြရအောင်နော်”
ခွင့်တောင်းဟန်ဖြင့် ပြောလိုက်လေသည်။

“အင်း မေ ပြန်လေ၊ ရပါတယ်”

“ဟုတ်ကဲ့ ကိုမိုးမြင့်ယံ”
ထို့နောက် မေတို့ ဟိုတယ်ဆီသို့ ပြန်လျှောက်လာခဲ့ကြ၏။

“ကျွန်တော်တို့ ညစာစားရင်း စကားဆက်ပြောကြရအောင် မေ”
ရုတ်တရက်ပြောလိုက်သော မိုးမြင့်ယံစကားကြောင့် မေ အံ့သြစွာဖြင့် သူ့အား ကြည့်လိုက်မိတော့သည်။

“ပြောမယ် မဟုတ်လား မေ”
မိုးမြင့်ယံက သူ့အား အံ့သြဟန်ဖြင့် ကြည့်နေသော မေမြတ်နိုးအား ထပ်မေးလိုက်၏။

“ကိုမိုးမြင့်ယံ မေ့ကို ပြောစရာရှိသေးလို့လား”
ခပ်တိုးတိုးဖြင့် မေ မေးလိုက်သည်။

“အင်း မေ၊ ပြောစရာတွေ အများကြီးရှိသေးတယ်၊ မေကော ပြောမယ် မဟုတ်လား”

မိုးမြင့်ယံက မေ့အား ပြောလည်းပြော မေးလည်းမေးလိုက်သည်။ မိမိ၏ အပြုအမူတွေက ကလေးဆန်နေ သည်လားဟု မစဉ်းစားနိုင်တော့။ မိမိစိတ်ဝင်စားခဲ့သူ၊ အမြဲသတိရခဲ့သောသူနှင့် စကားတွေ အများကြီး ပြောချင်သည်။ နောက်နှစ်ရက်လောက်ဆိုလျှင် မိမိရန်ကုန်သို့ အလုပ်ကိစ္စဖြင့် ပြန်ရတော့မည်။ မပြန်ခင် မေနှင့် ရင်းနှီးချင်သည်။မေက မိမိကို မေးပြီး ငြိမ်သွားသော ကိုမိုးမြင့်ယံ၏ အမူအယာကြောင့် အနည်းငယ်အံ့သြသွားမိသည်။

“ကိုမိုးမြင့်ယံ ဘာတွေများတွေးနေလဲ”
မေမြတ်နိုး၏ အမေးစကားကြားမှ မိုးမြင့်ယံ မိမိ၏ အတွေးလွန်သွားမှုကို သတိရလိုက်၏။

“ဘာရယ် မဟုတ်ပါဘူး မေ”
မိုးမြင့်ယံက မေ့အား ကြည့်ရင်း ဖြေလိုက်သည်။

မေ သဘောကျကာ နှစ်နှစ်ခြိုက်ခြိုက်လေး ရယ်လိုက်မိတော့၏။

“ဘာလို့ ရယ်တာလဲ မေ”

“ကိုမိုးမြင့်ယံရဲ့ ပုံစံက မဟုတ်တာလုပ်တုန်း လူမိသွားတဲ့ ကလေးတစ်ယောက်ပုံစံဖြစ်နေတာကိုး”

မေမြတ်နိုးစကားအဆုံးတွင် နှစ်ယောက်လုံး တစ်ယောက်ကိုတစ်ယောက်ကြည့်ကာ သဘောကျစွာဖြင့် ပြိုင်တူ ရယ်လိုက်သည်။ ခုနကတော့ သူ့အား စိတ်ဆိုးမာန်ဆိုးဖြင့် ပြောခဲ့ပေမယ့်လည်း ခုတော့ သူ့ကို နားလည်ပေးလိုက်ပြီး ပွင့်လင်းရိုးသားစွာဆက်ဆံပေးသော မေမြတ်နိုး၏ ဆက်ဆံမှုကြောင့် အချိန်တိုလေးအတွင်းတွင် တစ်ယောက်နှင့်တစ်ယောက် ရင်းနှီးမှု အနည်းငယ်ရသွားလေသည်။

“ကိုမိုးမြင့်ယံ မေတို့ ဘယ်ဆိုင်မှာ စားကြမလဲ”

“မေ အဆင်ပြေတဲ့ဆိုင်မှာ စားပါ၊ ကျွန်တော်က ရပါတယ်”

“ဟုတ်ပါပြီ ကိုမိုးမြင့်ယံ”

ဟိုတယ်နှင့် မလှမ်းမကမ်းတွင်ရှိသော စားသောက်ဆိုင်တွင် မေတို့ ညစာစားလိုက်ကြသည်။ ညစာစားရင်း မိုးမြင့်ယံက ဤကမ်းခြေသို့လာရောက်သည့်အကြောင်းနှင့် ရန်ကုန်သို့ မေအလည်ပြန်ရောက်ပါကလည်း သူ့ဆီ ဆက်သွယ်ရန်မှာနေလေတော့သည်။ ထို့နောက် မေတို့ ဟိုတယ်သို့ ပြန်ခဲ့ကြတော့သည်။

“ညစာအတွက် ကျေးဇူးတင်ပါတယ် ကိုမိုးမြင့်ယံ”
မိုးမြင့်ယံအား မေ ကျေးဇူးတင်စကားပြောလိုက်သည်။

“မလိုပါဘူးဗျာ၊ ကျွန်တော်နဲ့ ညစာလိုက်စားတဲ့အတွက် မေ့ကို ကျွန်တော်က ကျေးဇူးတင်ရမှာပါ”
မေ မိုးမြင့်ယံအား ပြုံးပြလိုက်ရင်း ခေါင်းငြိမ့်ပြလိုက်၏။

“ဒါဆို မေ့ကို ခွင့်ပြုပါအုံး ကိုမိုးမြင့်ယံ”

“ဟုတ်ပါပြီ မေ”

မိုးမြင့်ယံက သူ့အား နှုတ်ဆက်ပြီးထွက်သွားသော မေမြတ်နိုးအား မျက်စိတဆုံးကြည့်ရင်း ကျန်ရစ်ခဲ့သည်။ ယဉ်ယဉ်လေးနှင့် ချစ်စရာကောင်းသော မေမြတ်နိုးအား သူအလွန်နှစ်သက်မိသည်။ မေမြတ်နိုးအား မိမိမှတ်မိ နေခြင်းကလည်း ဒီလိုချစ်စရာကောင်းသောပုံစံလေးကြောင့် မဟုတ်လား။ ယခုလို မေမြတ်နိုးရဲ့ ယဉ်ကျေး သိမ်မွေ့သောအမူအယာ၊ စကားပြောပုံဆိုပုံကို မြင်ရသောအခါ ပို၍နှစ်သက်မှုဖြစ်လာမိသည်။