အချစ်နှင့်အတူ (၇)

(၈)

မနက်ဝေလီဝေလင်းအချိန်မို့ လေနုအေးလေးများက တိုက်ခတ်နေသည်။ မေ ပင်လယ်ကြီးကိုကြည့်ပြီး အသက်ကို တ၀ကြီးရှူရှိုက်လိုက်၏။ ပင်လယ်ကမ်းခြေတွင် လမ်းလျှောက်ပြီး ပင်လယ်လေတ၀ကြီးရှူရသည် ကို မေ အလွန်ပဲ နှစ်သက်သဘောကျသည်။ အထူးသဖြင့် ပင်လယ်ရေအောက်မှ တက်လာသဖွယ်ရှိသော နေ၀န်းကြီးအား ကြည့်ရသည်ကို ကြိုက်သည်။ နံနက်ခင်းလေနုအေးလေးများတိုက်ခတ်မှုကြောင့် မေမြတ်နိုး စိတ်ထဲတွင် ကြည်နူးမှုများ ခံစားမိလျက်ရှိသည်။ ထို့ကြောင့် သီချင်းလေးညည်းရင်း မေ့ကိုတွေ့ချင်သည် ဆိုသော ဦးမိုးမြင့်ယံရှိရာအခန်းဆီသို့ ဆက်ထွက်ခဲ့တော့သည်။

ဦးမိုးမြင့်ယံအခန်းရှေ့ရောက်သောအခါ မေ တံခါးမခေါက်ဖြစ်သေးဘဲ ရပ်နေလိုက်မိသည်။

“ဦးမိုးမြင့်ယံ ဆိုတာ ဘယ်သူပါလိမ့်၊ ဘာကြောင့်များ မိမိကိုတွေ့ချင်သည်လဲ၊ မေ့တွင် မိုးမြင့်ယံဆိုသော အမည်ဖြင့် အသိအကျွမ်းလည်းမရှိ”

မေ တစ်ယောက်တည်းစဉ်းစားနေမိသည်။ ထို့နောက် စဉ်းစားရကြပ်လာသည်နှင့် ဆက်မစဉ်းစားတော့ဘဲ အခန်းတံခါးကိုသာ ခေါက်လိုက်မိ၏။ သို့သော်လည်း မည်သူတစ်ဦးတစ်ယောက်မျှ တံခါးကို လာရောက် ဖွင့်ပေးခြင်းမရှိချေ။ မေ ပတ်ဝန်းကျင်ကို တစ်ချက်ကြည့်လိုက်မိသည်။ မည်သူမျှမရှိ။

“အပြင်သွားနေ ကြတယ်ထင်တယ်၊ နောက်မှဘဲ ပြန်လာလိုက်ပါ့မယ်လေ”
မေ တစ်ယောက်တည်း တွေးလိုက်မိသည်။ ထို့နောက် မေ ဆက်မစောင့်တော့ဘဲ reception သို့ ပြန်ရန် လှည့်ထွက်လာလိုက်တော့သည်။

“မမေမြတ်နိုး …”
ရုတ်တရက်ခေါ်လိုက်သောအသံကြောင့် မေ နောက်သို့လှည့်ကြည့်လိုက်မိ၏။

“ကျွန်တော့်ဆီလာတာလား မမေမြတ်နိုး၊ ဆောရီးနော်၊ ကျွန်တော် ဟိုဘက်ကို လမ်းလျှောက်ခဏထွက်သွား လို့”
မေမြတ်နိုး ဘာမှမပြောဘဲ ထိုသူကိုသာ ကြည့်လိုက်မိသည်။ ထိုသူက မနေ့ကပင်မေနှင့်စကားပြောခဲ့သူ။ မေ့အား သူ့ကို မှတ်မိလားဟု လာမေးပြီး မေက မမှတ်မိဆို၍ စိတ်ဆိုးပြီးထွက်သွားသောသူ။ ယခုလည်း သူ့ကို လာရှာတာလား ဟု မေးနေပြန်သည်။

“ရှင့်ကို လာရှာတာ မဟုတ်ပါဘူး ”
မေ ထိုသူအား ပြောလိုက်မိသည်။ ထို့နောက် မေ ဘာမှမပြောဘဲ လှည့်ထွက်မည်အလုပ် …

“မိုးမြင့်ယံကို လာရှာတာမဟုတ်လား”
ထိုသူက မေ့အား ပြောလိုက်၏။

“ရှင်က မေ ဦးမိုးမြင့်ယံကို လာရှာမှန်းဘယ်လိုသိ … ဟင် … ရှင်က …”

“ဟုတ်ပါတယ် မမေမြတ်နိုး၊ မမေမြတ်နိုးကို လာတွေ့ခိုင်းတဲ့ မိုးမြင့်ယံဆိုတာ ကျွန်တော်ပါပဲ”
မေ အံ့သြစွာဖြင့် ထိုမိုးမြင့်ယံဆိုသောသူကို ကြည့်လိုက်မိသည်။ ထို့နောက် …

“မေ့ကို တွေ့ချင်တယ်ဆိုတာက …”
မေ ယောင်နနဖြင့် မေးလိုက်မိသည်။

“မမေမြတ်နိုး ခုချိန်ထိ ကျွန်တော့်ကို မမှတ်မိသေးဘူးလားလို့ မေးချင်လို့”
မိုးမြင့်ယံက အေးဆေးစွာဖြင့် ပြောလိုက်သည်။

“ဟုတ်ကဲ့၊ မေ လုံးဝကို မမှတ်မိတာပါရှင်၊ ဒါနဲ့ မေ ဦးမိုးမြင့်ယံကို မှတ်မိတာ၊ မမှတ်မိတာက ဦးမိုးမြင့်ယံအတွက် အရမ်းကို အရေးကြီးနေလို့လား ရှင်”

“ကျွန်တော့်အတွက်တော့ အရေးကြီးတယ် မမေမြတ်နိုး၊ ဒါပေမယ့် ခုလောလောဆယ် အရေးကြီးတာကတော့ ကျွန်တော့်ကို ဦးမိုးမြင့်ယံလို့ မခေါ်ပါနဲ့လား”

“ဟုတ်ကဲ့ ကိုမိုးမြင့်ယံ၊ မေ့ကို ကိုမိုးမြင့်ယံဘယ်လိုသိတယ်ဆိုတာ ပြောပြနိုင်မလား၊ ပြောပြနိုင်မယ်ဆိုရင် တော့ မေ ကိုမိုးမြင့်ယံကို မှတ်မိကောင်း မှတ်မိသွားမှာပါ”

“မှတ်မိကောင်း မှတ်မိသွားမယ်ဆိုတော့ သေတော့မသေချာဘူးဆိုတဲ့သဘောပေါ့”
မိုးမြင့်ယံက မေမြတ်နိုးအား သေချာကြည့်ရင်း မကျေနပ်သလို မေးလိုက်မိသည်။

“အဲလိုတော့လည်း မဟုတ်ပါဘူး ကိုမိုးမြင့်ယံ၊ မေက ဖြစ်နိုင်တာကို ပြောတာပါ၊ လောလောဆယ်တော့ မေ မေးတာကိုသာ အရင်ဖြေပေးပါ”

“ကျွန်တော်တို့ လွန်ခဲ့တဲ့ ငါးနှစ်လောက်ကဆုံဖူးတာ မမေမြတ်နိုး၊ သီတင်းကျွတ်လပြည့်နေ့မှာပါ၊ ကျွန်တော်တို့ နှစ်ကြိမ်ဆုံဖူးပါတယ်၊ စကားလည်း နှစ်ခွန်းလောက်တော့ ပြောဖူးတယ်ထင်ပါတယ်၊ ကျွန်တော့်ကို မှတ်မိပြီလား မမေမြတ်နိုး”
မိုးမြင့်ယံက ပြောလည်းပြော မေးလည်းမေးလိုက်သည်။

အဖြစ်အပျက်က မေ့အတွက် အလွန်ကို အံ့သြစရာကောင်းသွားပြီ။ မေ ဘယ်လိုမှမထင်ထားမိသူက မေ အမြဲသတိရနေတတ်သော မေ့ ရင်ထဲကသူ။ ပိုထူးခြားတာက ဒီလိုပုံစံ၊ ဒီလိုအခြေအနေနဲ့ သူ့ကိုတွေ့ရလိမ့် မယ်လို့ မေ လုံးဝကို ထင်မထားမိခဲ့ခြင်းပင်။ မိမိနှစ်သက်တဲ့ ဒီလိုပင်လယ်ကမ်းခြေလိုနေရာမျိုးမှာ သူနဲ့ ပြန်တွေ့ရတယ်ဆိုတာကို မေ ဘယ်လိုမှကို မယုံရဲပေ။ မေ အရမ်းကို အံ့သြ၀မ်းသာမိသည်။ မေ့ ရင်ထဲတွင် ဖော်ပြလို့မရလောက်အောင်ကို ပျော်ရွှင်သွားမိသည်။ ပို၍ပျော်ရွှင်ရသည်က သူက မိမိအား မှတ်မိနေခြင်းပင်။ မိမိ၏ ရုပ်ပုံကိုရော၊ မိမိနှင့် ဆုံခဲ့ဖူးသော အကြောင်းအရာကိုရော သူမှတ်မိနေသည်ပေါ့။ ဒီလိုဆို သူလည်း မိမိကို အမြဲသတိတရရှိနေခဲ့ပုံပင်။ မေ အရမ်းကိုကြည်နူးမိသည်။ တကယ်လို့ သူသာ မိမိ၏ ရုပ်ပုံကို မမှတ်မိခဲ့လျှင် မေတို့ ခုလိုတောင် စကားပြောဖြစ်မည် မဟုတ်ပေ။ မေ အမြဲသတိရနေတတ်သူ၊ တွေ့ချင်နေမိသူက သူဖြစ်ကြောင်း မေ ဘယ်တော့မှလည်း သိရမည်မဟုတ်ချေ။ မေ တွေးမိလေ ပျော်လေ ဖြစ်လာတော့သည်။ “ကျေးဇူးတင်ပါတယ် ကိုမိုးမြင့်ယံ” မေ စိတ်ထဲမှ ပြောလိုက်မိတော့သည်။

“ကျွန်တော့်ကို မှတ်မိသွားပြီလား မမေမြတ်နိုး”
မိုးမြင့်ယံက သူ့အားကြည့် ပြီး ဘာမှ ပြန်မပြောသော မေမြတ်နိုးအား ထပ်မေးလိုက်သည်။

"ရှင်၊ ဟုတ်ကဲ့ ကိုမိုးမြင့်ယံ"
မေမြတ်နိုးက ခုမှပင်သတိဝင်လာလျက် ကရောသောပါးဖြင့် ဖြေလိုက်သည်။

မေမြတ်နိုး၏ အဖြေစကားကြောင့် မိုးမြင့်ယံအလွန်ပင်ကျေနပ်သွားမိသည်။ မိမိက ဆုံခဲ့ဖူးသောအကြောင်းကို ပြောလိုက်သည်နှင့် မိမိကို ချက်ချင်းမှတ်မိသွားသည်ဆိုတော့ မိမိကို သူလုံးဝ အမှတ်မရခြင်းတော့ မဟုတ်လောက်တော့။ မိမိ၏ ရုပ်ပုံကိုသာ မမှတ်မိခြင်းဖြစ်မည်။ ဘာပဲဖြစ်ဖြစ် သူ အရမ်းကို ၀မ်းသာသွားမိသည်။ မိမိကဲ့သို့ပင် သူကလည်း မိမိအား သတိရနေသည် မဟုတ်လား။

“ကိုမိုးမြင့်ယံ မေ့ကို ခုလိုလာတွေ့ခိုင်းတာ ဒီအကြောင်းပြောဖို့လားဟင်”
မေမြတ်နိုး၏ အမေးကြောင့် သူအတွေးကိုဖြတ်ရင်း ခေါင်းငြိမ့်ပြလိုက်သည်။

“ဟုတ်ကဲ့ပါ ကိုမိုးမြင့်ယံ၊ ခုလိုပြန်တွေ့ရတဲ့အတွက် ၀မ်းသာပါတယ်ရှင်၊ ဒါပေမယ့် မေ့မှာ အလုပ်လေးတွေ ရှိသေးတာမို့ ခွင့်ပြုပါအုံးနော်”

“ဟုတ်ကဲ့ မမေမြတ်နိုး၊ ဒါပေမယ့် ကျွန်တော်လည်း မမေမြတ်နိုးနဲ့ စကားထပ်ပြောချင်သေးတာမို့ ဘယ်အချိန်လောက်ဆိုရင် အဆင်ပြေနိုင်မလဲမသိဘူး”
မိုးမြင့်ယံက မေမြတ်နိုးအား ခွင့်တောင်းသလိုဖြင့် မေးလိုက်သည်။

“မနက်ဖြန်ညနေဘက်လောက်တော့ မေအားပါတယ် ကိုမိုးမြင့်ယံ”
မေ မိုးမြင့်ယံအား ကြည့်လိုက်ရင်း ဖြေလိုက်၏။

“ဟုတ်ကဲ့ မမေမြတ်နိုး၊ ဒါဆို မနက်ဖြန်ညနေငါးနာရီလောက် ကျွန်တော့်ဘန်ဂလိုရှေ့မှာတွေ့ကြတာပေါ့”

“ဟုတ်ကဲ့ ကိုမိုးမြင့်ယံ၊ ဒါဆို မေ့ကို ခုခွင့်ပြုပါအုံးနော်”

“ကောင်းပါပြီ ခင်ဗျာ”
မိုးမြင့်ယံဆီမှ စကားဆုံးသည်နှင့် မေမြတ်နိုး တာဝန်ကျရာ reception သို့ ဆက်ထွက်လာလိုက်တော့၏။

♠ ♠ ♠ ♠ ♠ ♠ ♠ ♠ ♠

ထိုနေ့တစ်နေ့လုံး မေမြတ်နိုး စိတ်တွေအရမ်းကို လှုပ်ရှားနေမိသည်။ “ကိုဘုန်းရေ … မေ အခုအရမ်းကို စိတ်တွေလှုပ်ရှားနေတယ်သိလား၊ မေ ပျော်လွန်းလို့ ဘာလုပ်ရမလဲတောင် မသိတော့ဘူး၊ ကိုဘုန်းကိုလေ ခုချက်ချင်းတောင် ပြေးပြောချင်နေပြီ သိလား၊ အင်း … ညကျရင်တော့ ကိုဘုန်းဆီ ဖုန်းဆက်ပြောအုံးမယ်” မေတစ်ယောက်တည်း စိတ်ထဲမှ ပြောနေမိသည်။ မေ့မျက်နှာက ပျော်ရွှင်မှုကြောင့် အပြုံးတွေဖြင့် လွှမ်းနေ တော့သည်။

“မေနိုး …”
ခေါ်သံကြောင့် မေ အတွေးများဖြတ်လိုက်ရင်း မော့ကြည့်လိုက်မိသည်။

“ဘာတွေများ သဘောကျနေတာလဲ မေနိုး၊ ကျွန်တော်ကြည့်နေတာကြာပြီ၊ ကျွန်တော်အနားရောက်လာ တာတောင် မသိဘူးထင်တယ်၊ ဘာလဲ မုန့်ဖိုးတွေဘာတွေများ အိမ်က ပို့လိုက်လို့လား”
ကိုလှိုင်ထွန်းက မေ့အားခေါ်ရင်း တစ်ဆက်တည်းပြောလိုက်တော့သည်။

“မဟုတ်ပါဘူး အစ်ကိုလှိုင်ထွန်းရဲ့”
မေ ကိုလှိုင်ထွန်းအား ပြုံးပြလိုက်ရင်း ခပ်သွက်သွက်ဖြင့် ဖြေလိုက်သည်။

“မဟုတ်ဘူးလား၊ ဒါဖြင့် ဘာကို ဒီလောက်သဘောကျနေတာလဲ၊ ကျွန်တော့်ကိုလည်း ပြောပါအုံး”

“ဘာမှ မဟုတ်ပါဘူး အစ်ကိုလှိုင်ထွန်းရယ်”

“ဟေး … ဒီနှစ်ယောက် ဘာတွေသဘောကျနေကြတာလဲ”

“ဒီမှာလေ မေနိုးရယ်လေ၊ တစ်ယောက်တည်း ဘာတွေသဘောကျနေတယ် မသိဘူး၊ တစ်ချိန်လုံး ပြုံးနေလို့၊ အဲဒါသူ့ကို ဘာတွေသဘောကျနေလဲလို့ မေးနေတာလေ၊ သူက ဘာမှမဟုတ်ဘူးချည်း ပြောနေလို့”
ကိုလှိုင်ထွန်းက မေတို့အား လှမ်းမေးရင်း အနားရောက်လာသော မခိုင်မာအား ပြန်ပြောလိုက်လေသည်။

“ဟုတ်တယ် လှိုင်ထွန်းရေ … မနက်ကတည်းက မိုးမြင့်ယံဆိုတဲ့ သူကို သွားတွေ့ပြီးကတည်းက အဲလိုဖြစ်နေတာ”

“သူက ဘယ်သူလဲမေ၊ မေ ချစ်သူများလား၊ ဒါကြောင့် ပျော်နေတာလား”
ခိုင်မာက ကိုလှိုင်ထွန်းကိုလည်း ပြောရင်း တစ်ဆက်တည်း မေ့ကိုပါ လှမ်းမေးလိုက်၏။

“မဟုတ်တာ မမခိုင်ရယ်”
မခိုင်မာ အမေးကြောင့် မေ ရှက်သွေးဖြာကာ မျက်နှာက ရဲလာတော့သည်။

“မဟုတ်ဘူးသာ ပြောတယ်နော် မေ၊ မျက်နှာကြီးက ရဲနေပြီ”

“ဟား … ဟား … ကောင်မလေးတစ်ယောက်တော့ ရှက်နေပြီ”
ကိုလှိုင်ထွန်းကလည်း မေ့ပုံစံကိုကြည့်ပြီး မေ့အား စနေတော့သည်။

“မဟုတ်ပါဘူးဆိုနေမှ အစ်ကိုလှိုင်ထွန်းနဲ့ မမခိုင်ကလဲ၊ မေ သွားတော့မယ်”
မေက မခိုင်မာနှင့် ကိုလှိုင်ထွန်းတို့အား ပြောလည်းပြော သူတို့အနားမှလည်း ပြေးထွက်လာခဲ့လိုက်သည်။

♠ ♠ ♠ ♠ ♠ ♠ ♠ ♠ ♠